Աշխատանքի ճանապարհը`

0
19
նպատակասլացությամբ, պատասխանատվությամբ ու նվիրումով…

Ընտրություն


       <<Բարգավաճ Հայաստան>> կուսակցությունը Մասիսի քաղաքապետի ընտրություններին առաջադրել և պաշտպանում է Կարապետ Օհանյանի թեկնածությունը: Նա ծնունդով Մասիսի տարածաշրջանի Մարմարաշեն գյուղից է: 2008 թվականից ԲՀԿ Մասիսի տարածքային կազմակերպության խորհրդի նախագահն է, 2009-ից` Մասիսի փոխքաղաքապետը: 
        -Հաշվի առնելով իմ հնարավորությունները,-նշեց պարոն Օհանյանը,-ինչու չէ, նաև ունեցածս կապերն ու ընկերական լայն շփումները, որոնք հարազատ քաղաքի համար ներդրումային բարենպաստ իրավիճակ և նոր աշխատատեղեր բացելու պայմաններ կստեղծեն, ինչպես նաև կազմակերպչական ու ղեկավարման ունակություններս, որոնք կարող եմ ծառայեցնել քաղաքի հետագա զարգացմանն ու բարգավաճմանը, ուստի որոշեցի առաջադրել թեկնածությունս…
       Համայնքի ղեկավարի թեկնածուն միաժամանակ նշեց, որ ՀՀԿ-ից առաջադրված թեկնածու Սաշիկ Հակոբյանին արժանի մրցակից է համարում, ահա թե ինչու նախընտրական թեժ պայքար է ընթանում: Հավատացած է, որ ընտրություններն անցնելու են արդար ու թափանցիկ` առանց էական ցնցումների: Պարոն Օհանյանը բարձրաձայնեց, որ հարգանքով է վերաբերվում գործող քաղաքապետ Դմիտրի Նազարյանի անցած ուղուն, ընտրվելու դեպքում շարունակելու և ավարտին է հասցնելու նրա կիսատ գործերն ու ձեռնարկումները: Նույն կերպ արտահայտվեց նաև նախկին քաղաքապետ, այսօր քաղաքապետի թեկնածու Սաշիկ Հակոբյանի հասցեին: Կարևոր համարեց ընդգծել նաև, որ 2007-ից Մասիսի տարածաշրջանի թիվ 16/1 ընտրատարածքից մեծամասնական, ապա` այս անգամ, համամասնական ընտրակարգով ԱԺ պատգամավոր ընտրված Տիգրան Ստեփանյանն իր օրինակելի գործունեությամբ` ժողովրդին միշտ հասանելի լինելու ձգտումով և բարեգործական ծանրակշիռ ներդրումներով, ցանկացած ԲՀԿ-ական համայնքապետի պարտավորեցնում է լավ աշխատել և լինել ժողովրդի կողքին ու կիսել նրա հոգսերը: Ինքը, մասնավորապես, գիտակցաբար ստանձնել է այդ մեծ պատասխանատվությունը և մինչև վերջ հավատարիմ է մնալու դրան: Նրա ցանկությունն է, որ Մասիսն ընտրի իրեն արժանի ղեկավարի, ում վստահում ու հավատում է: 

      Ինչպես այնուհետև տեղեկացանք պարոն Օհանյանի հետ մեր զրույցից, նրան այսօր ամենաշատ մտահոգողը երկրի սոցիալ-տնտեսական իրավիճակն է, ինչի պատճառով էլ արտագաղթի ծավալները գնալով ընդլայնվում են` վտանգելով մեր երկրի անվտանգությունը: Գտնում է, որ ինչպես ԲՀԿ-ն, այնպես էլ երկրի նախագահը լրջորեն մտահոգված են տվյալ խնդրով և վիճակը շտկելու ուղիներ են փնտրում: Ընտրապայքարում հաջողության հասնելու պարագայում Կարապետ Օհանյանն առաջնահերթությունը տալու է սոցիալական, քաղաքաշինության և գյուղատնտեսության ոլորտներին: Այսպես, ըստ նրա նախընտրական ծրագրի հիմնադրույթների, քաղաքապետարանի կառավարման համակարգում հետևողականորեն խթանվելու են ժողովրդավարական արժեքները` տիրելու է օրենքի գերակայությունը, մերժվելու է անօրինականությունը, իշխելու է արդարամտությունը, գործնական վերաբերմունք է ցուցաբերվելու քաղաքացու առաջարկների ու խնդիրների նկատմամբ: Երկրի տնտեսական կյանքի ժամանակավոր վայրէջքի պայմաններում քաղաքում աղքատության եզրին հասած ընտանիքներին օգնելու բարի տրամադրությունը պետք է դառնա հոգեբանություն: Տնտեսության վերականգնման ճանապարհ են ընտրվելու ներդրումային քաղաքականությունը, նոր աշխատատեղերի ստեղծումը, ազատ ձեռներեցությունը` ներգրավելով նաև սփյուռքի մեր հայրենակիցների հնարավորություններն ու կարողությունները և պահպանելով, բնականաբար, շուկայական հարաբերությունների սկզբունքները: Ելնելով քաղաքի` տարածաշրջանում գոյություն ունեցող հողատարածության առկայությունից, բարեփոխիչ ուշադրություն դարձնել գյուղատնտեսական մթերք արտադրող բնակչության պահանջներին: Համայնքային բյուջեն, կանոնավոր համալրվելով և հնարավոր նորաստեղծ միջոցներով հարստացվելով, հոգալու է քաղաքի բարեկարգման, կոմունալ-կենցաղային և տրանսպորտային համակարգի, ուսումնակրթական համալիրի, մշակութային, մարզական օջախների և առողջապահության ոլորտի կարիքները…
    Այն հարցին, թե համայնքը ղեկավարելու համար մարդը, արդյոք, ինչպիսի՞ հատկանիշներով պետք է օժտված լինի, պարոն Օհանյանը, որպես պատասխան, նախ կարևորեց, որ տվյալ անձը պետք է ղեկավարելու ունակություն ունենա, համբերատարություն, ցանկացած պահի հասանելի լինի իր բնակչին, ապրի բնակավայրի ամենօրյա հոգսերով, ինչպես նաև լինի մարդասեր ու ազգասեր: Իսկ, առհասարակ, մարդու մեջ գնահատում է ազնվությունը, ճշտապահությունը և աշխատասիրությունը: 
      Ընկերության հարցի շուրջ Կարապետ Օհանյանի դիտարկումը հետևյալն է.
  -Ընկերությունը հիմնաքարն է բոլոր հաջողությունների` լինի գործարարության մեջ, ամենօրյա աշխատանքում թե մարտադաշտում: Եթե չլինեին ընկերության վերաբերմունքն իմ հանդեպ և իմ փոխադարձ պատասխանատվությունը, ապա ես, միգուցե, չառաջադրվեի: Վստահորեն կարող եմ ասել, որ մեր ընկերական ողջ ներուժը ներդրվելու է համայնքի բարգավաճման գործին: Աստված մարդուն տվել է ներողամիտ ու մեծահոգի լինելու շնորհը: Դա իմ մեջ կա: Մանավանդ ընկերության պարագայում պետք է այդ գիտակցությամբ, աստվածատուր այդ շնորհով առաջնորդվել: 
    Նշենք, որ Կարապետ Օհանյանը հոգու ու սրտի թելադրանքով զինվորագրվել է աշխարհազորային <<Սասունցի Դավիթ>> հայրենասիրական հասարակական կազմակերպությանը և արժանի մասնակցություն բերել Արցախի ազատագրության սրբազան գործին: Այսօր էլ նրա ձեռնարկատիրական գործունեությանն անմասն չէ բարեգործությունը: Նրա օգնությունը բազմաբովանդակ ու բազմուղի է` Մասիս քաղաքի կենտրոնական հիվանդանոց, զինվորական կառույցներ, մանկապարտեզներ, հասարակական-բարեգործական միություններ և այլն: Հովանավորում է մարզա-մշակութային միջոցառումների կազմակերպմանն ու անցկացմանը, աջակցում զոհված ազատամարտիկների ընտանիքներին, ուսանողներին…
SHARE